Pəhriz Qurabiyəsi ( Yulaflı )

Əziz, xanımlar artıq yaz fəsli gəldi və qışdan qalan artıq çəkiləri atmaq üçün çoxumuz pəhrizə başladı. Pəhriz ərzində bəzilərimiz çörəkdən imtina edirik , bəzilərimiz  də şirniyyatdan. Lakin bir müddət sonra ürəyiniz şirniyyat istəyir və istəmədən pəhrizi pozursunuz. Bu gün sizlərlə paylaşacağım reseptlərlə pəhrizi pozmağa ehtiyac qalmayacaq. Həm orqanizminizin şəkər ehtiyacını qarşılayacaqsınız , həm də pəhriziniz davam edəcək : ) Tez keçək reseptə . İndidən hər kəsə nuş olsun. İnsAllah heç birinizin pəhrizə ehtiyacı qalmaz. İncə,gözəl , sağlam olmağı arzu edirəm : ) 

 

Ərzaqlar

1 stəkan yulaf 

1 ədəd banan

1 ədəd yumurta 

qoz, kişmiş , xurma , incir qurusu və s .( hər hansı biri və ya hərəsindən  bir az )

1 çay qaşığı qabartma tozu

Darçın ,hil ( zövqə görə )

Hazırlanma qaydası

1.Yumurtanın ağını mikserlə bir az çaldıqdan sonra içərisinə 1 ədəd banan əzib qatırıq.

2. Sonra isə qalan ərzaqların hamısını  əlavə edib qarışdırırıq. ( Quru meyvələrin miqdarını istəyə görə əlavə edə bilərsiniz. Pəhriz üçün edirsinizsə az miqdarda əlavə edin.)

3. Əlimizə yapışmayan hala gələnə qədər qarışdırırıq. Əgər əlinizə çox yapışsa bir az yulaf əlavə edin. 

4. Yağlı kağız sərilmiş qaba qurabiyə formasında düzürük. Əvvəlcədən qızdırılmış 180 C dərəcəli sobada  20-25 dəq bişiririk.