Şəkərbura

 

Milli mətbəximizin ən dadlı təamlarından olan Novruz xonçalarının bəzəyi- Şəkərbura reseptini  sizlərlə paylaşıram.Bayram yaxınlaşdıqca bütün evlərdə hazırlıqlar da başlayır.Əziz, xanımlar, dadlı, yumşaq xəmirli, bişdikdə rəngi göyərməyən şəkərburalar istəyirsinizsə bu resept tam sizə görədir.Yazılanlara əməl etsəniz istədiyiniz nəticəni əldə edəcəksiniz. Nuş olsun !

Ərzaqlar

Xəmir üçün

750 qr un

250 qr marqarin

340 qr yağsız və ya ortayağlı xama

2 ədəd yumurtanın sarısı

1 paket vanilin

bir çimdik duz

0,5 çay qaşığından  az quru maya

İçlik üçün

500 qr qabığı təmizlənmiş ağ fındıq ləpəsi

500 qr  şəkər tozu

1/4 çay qaşığı hil

0,5 çay qaşığı vanilin

Bəzəmək üçün 

maqqaş 

 

İçliyin hazırlanması

Tavada qovurub qabığını təmizlədiyimiz fındığı sürtgəcli maşından keçiririk və şəkər tozu , vanilin, hil ilə qarışdırırıq.

Hazırlanma qaydası

1. Əvvəlcə yağı sürtgəcdən keçirib un ilə birgə qabda yaxşıca qarışdırırıq.

2.Sonra qalan ərzaqları da bura əlavə edib xəmir yoğururuq.

3. Üzərini örtüb 15-20 dəq gözlədirik .

4. Daha sonra alınan xəmirdən hər biri 40 qr olmaqla kündələr ayırırıq.

5. Kündələri  təqribi 10 sm diametrində  yayıb,  hər bir kündəyə 2 çay qaşığı içlik qoyub bükürük və üzərinə maqqaşla bəzək vururuq.

6. Bişirəcəyimiz qaba düzüb bir az (5-10 dəq ) dincəlməyə qoyuruq.

7. 150-160 C dərəcədə əvvəlcədən qızdırılmış sobada  20 dəq bişiririk. ( siz sobanıza uyğun 170-180 dərəcədə də bişirə bilərsiniz.Temperatur çox artıq olmamalıdır )

8. Diqqətli olun üstü qızarmasın. Altı qızarmalıdır, amma üzəri ağ qalmalıdır.

9.Soyuduqdan sonra boyatlamaması üçün ağzı bağlı bir qabda saxlayırıq.Bu cür saxladıqda daha da yumşaq olur. Bu şəkərbura xəmirinin hazırlanması digərlərindən bir az fəqlənir.Üstü açıq saxlamasanız bişirdikdən 1 həftə sonra da dadına baxanda  yumşaq olduğunu görəcəksiniz.

 

 

Advertisements